काठमाडौं-नेपाली भूमी अतिक्रमणको चपेडामा परेको भन्दै त्यसलाई जोगाउन सरकारको ध्यानाकर्षण गराइएको छ । नेपालको उत्तरी सिमानामा अतिक्रमण भएको भन्दै नेपाली युवाहरूले स्थलरुप नापी तथा भू–उपयोग व्यवस्थापन महाशाखामा ज्ञापन पत्र बुझाउँदै सरकारको ध्यानाकर्षण गराएका हुन् ।

सीमा संरक्षण संघर्ष समितिका युवाहरूले शुक्रबार काठमाडौंस्थित महाशाखाको कार्यालयमा पुगेर चीनले उत्तरी सिमानामा मिचेको नेपाली भू–भाग फिर्ताको माग गर्दै ज्ञापन पत्र बुझाए । सरिता ज्योतिको नेतृत्वमा महाशाखा पुगेका युवाहरूले उपमहानिर्देशक करुणा केसीलाई ज्ञापन पत्र बुझाउँदै देशको सीमा रक्षाका लागि गम्भीर हुनुपर्ने बताए ।

यसैबीच चीनले मिचेको जग्गा फिर्ता गराउन माग गर्दै पुगेका युवालाई महाशाखाका कर्मचारीले अभद्र व्यवहार गरेको युवाहरुले आरोप लगाएका छन् । सरकारको ध्यानाकर्षणसहित सामूहिक तस्वीर खिचाउने क्रममा प्रहरीले आफूहरुमाथि अभद्र व्यवहार गरेको उनीहरुको आरोप छ।