विश्व विजेता फ्रान्स तथा स्पेनिस क्लब एट्लेटिको मड्रिडका स्टार खेलाडी एन्टोइनी ग्रिजम्यानले क्लब छाड्ने घोषणा गरेका छन् ।

उनले ट्वीटरमा भिडियो सार्वजनिक गर्दै क्लब छाड्ने घोषणा गरेका हुन् । भिडियोमा उनले यो सिजनको अन्त्यसँगै क्लबबाट बिदा हुने योजना समर्थकलाई सुनाएका हुन् ।

५ वर्षका लागि क्लबसँग सम्झौता गरेका उनले शनिबार राति लेभान्टेसँगको खेल नै आफ्नो क्लबका लागि अन्तिम खेल भएको बताए ।

बीबीसीले ग्रिजम्यानलाई १ सय २० मिलियन युरोमा बार्सिलोनाले किनेको उल्लेख गरेको छ । ‘यी पाँच वर्ष निकै राम्रो रह्यो । यसका लागि एट्लेटिको परिवारलाई धन्यवाद,’ उनले भने, ‘मलाई सधै माया गरीरहने मेरा समर्थकलाई म यो जानकारी गराउन चाहान्छु कि म यो सिजनबाट क्लब छाड्ने तयारी गरिरहेको छु । जुन नयाँ काम सँगसँगै अर्को चुनौतिको सामना पनि गर्दैछु ।’

२०१४ मा रियल सोसियाडबाट एट्लेटिको आएका ग्रिजम्यानले क्लबमा रहँदा खेलेका २ सय ५६ खेलमा १ सय३३ गोल गरेका छन् ।