बगदाद– सुरक्षा बलको कारवाहीमा इराकमा आतंककारी समूह इस्लामिक स्टेटका एक वरिष्ठ कमाण्डरसहित ५ लडाकु मारिएका छन् ।

उत्तरपूर्वी इराकको हमरिन पहाडी क्षेत्रमा सेनाले गरेको कारवाहीमा उनीहरुको मृत्यु भएको हो । मारिने कमाण्डरको पहिचान भने खुलाइएको छैन ।

मुलुकको दियाला प्रान्तमा प्रतिआतंवादी विशेष फौजले गरेको कारवाहीमा उनीहरुको मृत्यु भएको जनाइएको छ । दियाला प्रान्तको राजधानी बकुबा नजिक गरिएको कारवाहीमा इस्लामिक स्टेटका वरिष्ठ कमाण्डर र उनका ४ ‘अनुयायी’ को ज्यान गएको बताइएको छ ।

पछिल्ला केही दिनमा त्यस क्षेत्रमा इराकी सेना तथा अमेरिकी सेनाका लडाकु विमानबाट भारीस्तरमा हवाई आक्रमण हुँदै आएको थियो ।

हाल इराकमा इस्लामिक स्टेटको नियन्त्रणमा कुनै पनि भूभाग नरहेपनि इस्लामिक स्टेटका लडाकुहरु मुलुकको विभिन्न स्थानमा लुकेर छापामार शैलीमा आक्रमण गर्दै आएको बताइन्छ ।