एजेन्सी – इंग्लिस प्रिमियर लिगमा म्यान्चेस्टर सिटीले क्रिष्टल प्यालेसमाथि सहज जीत हात पारेको छ । क्रिष्टल प्यालेसलाई ३-१ गोल अन्तरले पराजित गरेको सिटी शीर्ष स्थानको लिभरपुल भन्दा ३ अंकले पछि छ ।

सिटीका लागि क्रिष्टल प्यालेसविरुद्ध रहिम स्ट्रलिङले दुई गोल गरे भने गाव्रिएल जिससले एक गोल गरे । स्ट्रलिङले खेलको १५ औं मिनेटमा गोल गर्दै टिमलाई १-० को अग्रता दिलाए भने ६३ औं मिनेटमा व्यक्तिगत दोस्रो तथा टिमका लागि पनि दोस्रो गोल गर्दै २-० अग्रता दिलाए ।

स्ट्रलिङले दुई गोल गरेपछि २-० गोलले पछि परेको क्रिष्टल प्यालेसका लागि लुका मिलिभोजुकले खेलको ८० औं मिनेटमा गोल गर्दै सिटीविरुद्ध पहिलो गोल फर्काएका थिए । तर, खेलको अन्तिम मिनेटमा जिससले गोल गर्दै सिटीलाई ३-१ को जीत दिलाए ।

क्रिष्टल प्यालेसलाई पराजित गरेको सिटीले ३३ खेलमा ८३ अंक बनाएको छ भने शीर्ष स्थानको लिभरपुलसँग ३ अंकको स्पष्ट दुरी छ । शीर्ष स्थानको लिभरपुलले चेल्सीलाई पराजित गर्दै सिटीसँगको दुरी बढाएको हो । पराजित क्रिष्टल प्यालेसको ३४ खेलमा ३९ अंक छ ।