काठमाडौं–संघीय सरकारले समायोजन गरी पठाएका कर्मचारीलाई केही स्थानीय तहले फिर्ता पठाएका छन् । आफूसँग साविकमा कार्यरत कर्मचारी पर्याप्त भएको भन्दै संघीय सरकारले पठाएका कर्मचारी फिर्ता गरेको नागरिक दैनिकमा खबर छ । कर्मचारी फिर्ता गराउने स्थानीय तहमा काठमाडौं महानगरपालिका, ललितपुर महानगरपालिका, भक्तपुर नगरपालिका, मध्यपुर थिमि नगरपालिका छन् ।

स्थानीय मन्त्रालयका निमित्त सचिव सुरेश अधिकारीले मन्त्रालयले समायोजन गरी पठाएका ३० जना कर्मचारी स्थानीय तहले फिर्ता पठाएको जानकारी आएको बताए ।

प्रहरीलाई पालबाट भवनमा सार्न दुई अर्ब माग शीर्षकको समाचारमा भूकम्पपछि टेकुस्थित नेसनल ट्रेडिङको भवन र खाली चौरमा पाल टाँगेर कार्यालय सञ्चालन गर्दै आएका दुई प्रहरी निकायलाई व्यवस्थापन गर्न नेपाल प्रहरीले बजेट दिन अर्थ मन्त्रालयले आनाकानी गरेको छ । महानगरीय प्रहरी परिसर काठमाडौं र महानगरीय अपराध महाशाखालाई नयाँ भवन निर्माण गरी त्यहाँबाट सार्न प्रहरी प्रधान कार्यालयले जग्गा खरिद गर्न अर्थसँग २ अर्ब मागेको छ । तर अर्थले आनाकानी गरेको प्रहरी प्रधान कार्यालयले जनाएको छ ।

त्यस्तै पत्रिकाले लुक्लामा जहाज दुर्घटना हुँदा तीन जनाको मृत्यु भएको, सत्य निरुपण तथा मेलमिलाप आयोग दोषारोपणमै चार वर्ष बितेको, सट्टाभर्ना भइसकेको जग्गा भूमाफिया र व्यक्तिको कब्जामालगायतका समाचारलाई प्राथमिकतामा छापेको छ ।