जनकपुर– तराईका जिल्लाको भ्रमणमा रहेका पूर्व राजा ज्ञानेन्द्र शाहले शुक्रबार जनकपुरको जानकी मन्दिरमा पूजाआजा गरेका छन् । जनकपुर पुग्दा पूर्वराजा शाहलाई स्थानीयले स्वागत गरे ।

उनी सर्लाही हुँदै शुक्रबार जनकपुर पुगेका हुन् । विहीबार उनले सर्लाहीको दुर्गा मन्दिरमा पूजाआजा गरेका थिए । तराईका जिल्लाको भ्रमण तथा पूजाआजामा व्यस्त भए पनि उनले कुनै प्रतिक्रिया दिएका थिएनन् ।

तर, शुक्रबार भने उनले जानकी मन्दिरमा पूजाआजा गरेपछि मुलुकमा शान्ति र जनताको भलो चाहेको प्रतिक्रिया दिए । मधेश कस्तो लाग्छ भन्ने पत्रकारको प्रश्नमा पूर्वराजा शाहले भने- ‘मधेश होइन तराई भन्नुस् ।’

जनकपुरमा जानकी मन्दिरका पुजारीले शाहलाई चाँदीले बनेको जानकी मन्दिरको प्रतिमा प्रदान गरेका थिए । त्यस्तै पूर्वराजा शाहलाई राप्रपा नेपाल, राप्रपा संयुक्त, शिव सेना, राजपा लोकतान्त्रिकलगायतका कार्यकर्ता तथा समर्थकहरुले फूलमालासहित स्वागत गरेका थिए ।

उनी शनिबार उदयपुर पुगेर पुनः जनकपुर पुगी आइतबार काठमाडौं फर्किने कार्यक्रम रहको उनका निजी सचिव फणि पाठकले जानकारी दिए ।

जानकी मन्दिरमा पूर्वराजले गरे पूजाअर्चना (भिडियो)