इजरायल– आर्थिक राजधानी तेल अभिभमा रकेट आक्रमण भएपछि इजरायलले प्यालेष्टाइनको गाजा क्षेत्रमा व्यापक आक्रमण गरेको छ ।
इजरायली वायुसेनाले गाजा क्षेत्रमा रहेको त्यहाँ सक्रिय इस्लामिक समूह हमासका १ सय भन्दा धेरै आधार शिविरलाई लक्षित गरी आक्रमण गरेको जनाएको हो ।

आक्रमणमा गाजा क्षेत्रमा भएको क्षतिबारे भने केही खुलाइएको छैन । त्यसअघि प्लोष्टाइनी क्षेत्रबाट तेल अभिभ शहरमा ६ वटा रकेट प्रहार गरिएको बताइएको छ ।

६ वटा रकेट प्रहार गरिएको भएपनि इजरायलको अत्याधुनिक आइरन डोम क्षेप्यास्त्र प्रतिरक्षा प्रणालीले ५ वटा रकेट खसालेको तर, एउटा रकेट मात्रै विष्फोट हुन पाएको इजरायली अधिकारीले जनाएका छन् । रकेट आक्रमणमा कुनै क्षति नभएको समेत बताइएको छ ।

इजरायलको आर्थिक राजधानी तेल अभिभमा सन् २०१४ को गाजा युद्ध पछि भएको यो पहिलो रकेट आक्रमण हो । यता गाजा क्षेत्रमा सक्रिय समूह हमासले भने आक्रमणमा आफ्नो संलग्नता नरहेको जनाएको छ ।

तर, इजरायलले भने आक्रमणमा हमासको बाहेक अरु कुनै समूहको संलग्नता हुनै नसक्ने भन्दै हमासको सैनिक शिविरलाई लक्षित गरी हवाई आक्रमण गरेको हो ।