काठमाडौं– सरकारले देशका विभिन्न स्थानमा तरकारी तथा फलफूल बजार सञ्चालन गर्ने भएको छ ।

यसका लागि ९ वटा जिल्लाको विस्तृत अध्ययन प्रतिवेदन(डीपीआर) तयार परेको छ ।

कृषि पूर्वाधार विकास तथा कृषि यान्त्रिकीकरण प्रवर्द्धन कार्यक्रमबाट मुलुकभर ९ स्थानमा आधुनिक तरकारी, फलफूल बजार स्थापनाका लागिका लागि अध्ययन सकिएको र अब बजारका सञ्चालनका लागि कार्यक्रम अघि बढाइने कृषि तथा पशुपक्षी विकास मन्त्रालयले जानकारी दिएको छ ।

मन्त्रालयका अनुसार मकवानपुर, सुनसरी, मोरङ, महोत्तरी, पर्सा, कास्की, कपिलवस्तु, बर्दिया र रुपन्देहीमा तरकारी तथा फलफूल बजार सञ्चालन हुने भएको हो । यी जिल्लामा बजारका सञ्चालनका लागि कुल ६ अर्ब ७५ करोड ७ लाख ४० हजार रुपैयाँ लागत लाग्ने मन्त्रालयले जनाएको छ ।

मन्त्रालयले देशभर तरकारी तथा फलफूल बजार निर्माणका लागि विभन्नि कार्यक्रम सञ्चालनमा ल्याउन योजना अघि सरेको थियो । सोही अनुसार पहिलो चरणमा ९ वटा जिल्लामा तरकारी तथा फलफूलको लागि आधुनिक बजार खोल्न डिपीआर तयारी भएको जानकारी दिएको छ । उत्पादन र कृषिको मागलाई मध्येनजर गरेर डीपीआर तयार गरिएको र सोही अनुसार काम अघि बढ्न कृषि मन्त्रालयका कार्यक्रम प्रमुख प्रकाश सञ्जेलले बताएका छन् ।