काठमाडौं– रौतहट क्षेत्र नम्बर २ बाटा प्रतिनिसभा सदस्यमा निर्वाचित पूर्व मन्त्री एवम् नेपाली कांग्रेसका नेता मोहम्म अफताब आलमले सांसदको रुपमा पाउने पदीय हैसियत र सेवासुविधा रोक्का भएको छ ।

संघीय संसद सचिवालयले सूचना टाँस गरी पक्राउ परेको जानकारी गराएसँगै उनको सांसद पदको हैसिय र सेवासुविधा तत्कालका लागि रोकिएको हो ।

२७ चैत २०६४ मा भएको बम बिस्फोट तथा बम विस्फोट पछि घाइतेहरुको सामूहिक हत्या गरिएको घटनाको अनुसन्धानका क्रममा आलम आइतबार रौतहटस्थित आफ्नै घरबाट पक्राउ परेका थिए ।

संसद सचिवालयले सोमबार सूचना टाँस गरी आलम पक्राउ गरेको जानकारी गराएको छ ।

संसद सचिवालयले प्रतिनिधिसभा नियमावली, २०७५ को नियम २४४ को उपनियम (३) को प्रयोजनका लागि भनेर आलम पक्राउ परेको जानकारी दिएको हो ।

प्रतिनिधिसभा नियमावली, २०७५ को नियम २४४ को उपनियम (३) अनुसार प्रतिनिधिसभाका कुनै सदस्यलाई फौजदारी अभियोगको अनुसन्धानका लागि पक्राउ गरेको जानकारी प्राप्त भएका सांसदको हैसियतले कुनै पनि कार्य गर्ने, कुनै अधिकार वा अन्मुक्ति प्राप्त नहुने उल्लेख गरिएको छ ।

जसअनुसार पक्राउ परेका आलमले प्रतिनिधिसभा सदस्यका रुपमा खाइपाइ आएको पारिश्रमिक, सेवा–सुविधा पनि रोकिने छ ।

१२ वर्षदेखि प्रहरीको खोजी सूचीमा रहेका आलम घटनापछि पनि चुनाव जितेर सांसद भएका थिए ।