काठमाडौं– मलेसिया सरकारले दिएको आममाफी कार्यक्रम ‘द ब्याक फर गुड’मा सहभागी भएर २० जना स्वदेश फर्किएका छन् ।

मलेसियास्थित नेपाल दूतावासले अगष्टबाट शुरु भएको यो कार्यक्रममा सहभागी भएका २० जनालाई घर फर्किन आवश्यक कागतजागत मिलाएर पठाएको जानकारी दिएको छ ।

उनीहरु मंगलबार स्वदेश फर्किएको दूतावासले जानकारी दियो । मलेसिया सरकारले गत अगष्ट १ तारिखदेखि लागू हुनेगरी ‘द ब्याक फर गुड’ कार्यक्रम शुरु गरेको थियो । उक्त कार्यक्रम अन्तर्गत ७ सय रिंगिट (करिब २० हजार रुपैयाँ) जरिवाना तिरेपछि अवैधानिक कामदारलाई स्वदेश फर्किन दिइने छ ।

आममाफीको समयावधी अगष्ट १ देखि डिसेम्बर ३१ सम्म ४ महिना रहेको छ ।

मलेसिया रोजगारीमा गई करार अवधि सकिएपछि पनि रोजगारदाता कम्पनीमा शरण लिएर बसेका कागजपत्रबिहीन विदेशी कामदारलाई स्वदेश फर्किने मौका त्यहाँको सरकारले दिएको छ ।

यो कार्यक्रमा गएको २ हप्तामा २ हजारभन्दा धेरै विदेशी कामदार सहभागी भएका छन् ।