एजेन्सी– अमेरिकी विदेशमन्त्री माइक पोम्पेओले मध्यपूर्वमा सहकार्यको नयाँ युगको आह्वान गरेका छन् । ६० भन्दा धेरै विदेशमन्त्री तथा कुटनीतिज्ञबीच पोल्याण्डको राजधानी वार्सामा भएको सम्मेलनका क्रममा कुनै पनि मुलुकले मध्यपूर्वको समस्या एक्लै समाधान गर्न नसक्ने भन्दै सहकार्यका लागि आह्वान गरेका हुन् ।

अमेरिकाले सन् २०१५ मा भएको आणविक सम्झौताबाट बाहिरिने घोषणा गरेपछिको यो पहिलो सम्मेलन हो । सम्मेलनका क्रममा पोम्पेओले प्रत्यक्ष रुपमा इरानको आलोचना भने नगरेको जनाइएको छ ।

सम्मेलनमा इजरायल, साउदी अरब, ओमनसहित मध्यपूर्वका अन्य मुलुकहरु, युरोपेली मुलुकका विदेशमन्त्री तथा कुटनीतिज्ञहरुको सहभागिता छ । सम्मेलनमा इरानलाई भने निम्तो नदिइएको अन्तर्राष्ट्रिय सञ्चारमाध्यमले जनाएका छन् ।