एजेन्सी– अफ्रिकी मुलुक जिम्बाब्वेमा दुई सुनखानीमा बाढी आउँदा कम्तीमा २३ कामदार डुबेका छन् । राजधानी हरारेबाट दक्षिणपश्चिममा रहेको काडोमा शहरनजिक रहेका क्रिकेट खानी तथा सिल्भर मुन खानीमा बाढीको पानी पसेको हो ।

बाढीपछि त्यहाँ डुबेका सबै कामदारको मृत्यु भएको हुनसक्ने अनुमान गरिएको छ । यद्यपि कोही जीवित रहेको आशंका तथा मृतकको शव बाहिर निकान्लका लागि खानीबाट पानी बाहिर निकाल्ने काम जारी रहेको जिम्बाब्वेका अधिकारीले जनाएका छन् ।

अनुमतिप्राप्त कम्पनीले सञ्चालन गर्दै आएको खानीमा कसैलाई थाहै नदिई अवैधानिक कामदार खानीभित्र छिरेका बेला बाढीको पानी पसेका बेला बताइएको छ । खानीभित्र छिरेका ३८ जनामध्ये १५ जनालाई उद्धार गरिएको थियो । त्यहाँ रहेका अरु २३ जना अझैँ त्यहीँ फसिरहेको आशंका गरिएको छ ।

नजिकै रहेको बाँध फुटेर खानीमा बाढीको पानी पसेको अन्तर्राष्ट्रिय सञ्चारमाध्यमले जनाएका छन् ।