काठमाडौं– स्पेनिस महारथी रियल मड्रिडले एसियाली फुटबलको पावर हाउस जापानका खेलाडी ताकेफुसा कुवोलाई क्लबमा आवद्ध गरेको छ । शुक्रबार उनलाई रियलले क्लबमा लिन सम्झौता पत्रमा हस्ताक्षर गरेको हो ।

रियलले उनलाई विश्वमै उत्कृष्ट खेल्ने खेलाडीका रुपमा परिभाषित गर्दै टोलीमा आवद्ध गरेको छ । कुवो जापानका ‘मेस्सी’ को रुपमा चिनिन्छन् । मिड्फिल्डर कुवोलाई रियल मड्रिडको रिजर्भ टिम कस्टियामा लिएको हो । १८ वर्षीय कुवो शनिबारबाट शुरु हुन लागेको कोपा अमेरिकाका लागि जापानी टोलीबाट खेल्न ब्राजिल पुगेका छन् ।

उनले जापानबाट जुन ९ मा एल साल्भाडोरविरुद्ध खेल्दै अन्तर्राष्ट्रिय डेब्यु गरेका थिए । रियलले उनलाई २ मिलियन युरो खर्च गरेको छ । उनलाई रियलले ५ वर्षका लागि क्लबमा लिएको अन्तर्राष्ट्रिय समाचारहरुले उल्लेख गरेका छन् ।