काठमाडौं– कोपा अमेरिकाको ४६ औं संस्करण आज (शुक्रबार)बाट शुरु हुँदैछ । दक्षिण अमेरिकी महादेशका १० टोली र दुई आमन्त्रीत टोलीले प्रतिस्पर्धा गर्ने यस प्रतियोगिताको पहिलो खेलमा आयोजक ब्राजिल र बोलिभियाले खेल्दैछन् ।

ब्राजिलमा भइरहेको प्रतियोगिता जुन १४ अर्थात् आजबाट जुलाई ७ सम्म चल्नेछ । प्रतियोगिताको पहिलो खेल नेपाली समय अनुसार शनिबार बिहान सवा ६ बजेबाट शुरु हुनेछ । ब्राजिलमा आयोजना हुने यस संस्करणमा दक्षिण अमेरिकाका १० र आमन्त्रीत दुई गरी कूल १२ टोलीले प्रतिस्पर्धा गर्दैछन् । आमन्त्रित टोलीहरुमा एसियाका दुई शीर्ष देशहरुले प्रतिस्पर्धा गर्नेछन् ।

एसियाको पावर हाउसका रुपमा पहिचान बनाएको जापान र सन् २०२२ को विश्वकपको आयोजक टोली कतार रहेका छन् । प्रतियोगितामा सहभागी १२ टोलीलाई तीन समूहमा विभाजन गरिएको छ । साविक विजेता टोली चिली देखि ब्राजिल, अर्जेन्टिना, कोलम्बिया र उरुग्वेलाई उपाधिको दाबेदार टोलीका रुपमा हेरिएको छ भने एसियाबाट सहभागीता जनाएका जापान र कतार कोपा अमेरिकामा सुधारिएको खेल प्रस्तुत गर्ने फुटबल पण्डितहरु बताउँछन् ।

विश्वका चर्चित खेलाडी अर्जेन्टिनाका कप्तान लियोनल मेस्सीको टोली अर्जेन्टिनाको प्रदर्शन र मेस्सीको टोलीका लागि योगदान कस्तो रहला भन्ने पनि यतिबेला आम फुटबल प्रशंसकको चासो छ । यता, आयोजक ब्राजिल भने स्टार खेलाडी नेयमार विनै मैदान उत्रिदैछ । नेसन्स लिग छनोट खेलमा चोटग्रस्त भएका नेयमार ब्राजिल टोलीबाट तीन हप्ताका लागि आराम पाएका छन् ।