काठमाडौं– सरकारले इन्टरनेट सेवा प्रदायकलाई विभिन्न शीर्षकमा राजस्व छुट दिने भएपछि इन्टरनेटको शुल्क बृद्धि नहुने भएको छ ।

इन्टरनेट वायर तथा राउटर लगायतका उपकरण जडान, लिज लाइन डाटा कनेक्टिभिटी र मर्मत सम्भार शुल्कमा सरकारले दुरसञ्चार सेवा शुल्कमा छुट दिने भएपछि इन्टरनेटको शुल्क वृद्धि नहुने भएको हो ।

यसअघि इन्टरनेट प्रदायकहरुले २० प्रतिशतसम्म शुल्क बढ्ने सूचना ग्राहकलाई पठाएका थिए । सरकारले इन्टरनेट सेवा प्रदायकको माग सम्बोधन गरेकाले तत्काल इन्टरनेटको शुल्क नबढ्ने सर्भिस प्रोभाइडर एशोसिएसन अफ नेपाल (आइएसपीएएन्) का अध्यक्ष भोजराज भट्टले जानकारी दिए ।

सरकारलाई १३ प्रतिशत दुरसञ्चार सेवा शुल्क तिर्न भन्दै आगामी साउन १ गतेदेखि इन्टरनेट सेवा प्रदायकहरुले उपभोक्ताबाट २० प्रतिशत शुल्क उठाउने निर्णय गरेका थिए । सरकारले विभिन्न शीर्षकमा राजस्व छुट दिने भएपछि व्यवसायीहरुले शुल्क नबढाउने निर्णय गरेका हुन् ।