दार्चुला– सामाजिक कुरीतिका रुपमा रहेको छाउपडी प्रथा अन्मुलनका लागि सरकारले विभिन्न कार्यक्रम सञ्चालन गरिरहेको छ ।

सुदूरपश्चिम तथा कर्णाली प्रदेशमा व्याप्त यो प्रथा अन्मुलनका लागि गैरसरकारी संस्था पनि उत्तिकै ‘सक्रिय’ छन् । तर, अहिलेसम्म छाउपडी प्रथा अन्मुलनका क्षेत्रमा प्रभावकारी काम भएको देखिँदैन ।

दार्जुलाको अपिहिमाल गाउँपालिकाले छाउडपडी प्रथा अन्त्य गर्ने एउटा नयाँ जुक्ति निकाले छ ।

गाउँपालिकाले छाउमुक्त अभियानअन्तर्गत सार्वजनिक धारा र शौचालय निर्माण गर्न थालेको छ । यस्ता धारामा छाउपडी र छुवाछुतजन्य व्यवहार गर्न पाइने छैन ।

चालू आर्थिक वर्षमा गाउँपालिकाले ३ लाख रुपैयाँका दरले ३ वडामा छाउमुक्त धारा निर्माण गरिएको छ ।

विगतमा महिनावारी हुँदा छुट्टै धारामा नुहाउनुपर्ने, दलित गैर–दलितले छुट्टै धाराको पानी भर्नुपर्ने परम्पराको अन्त्यका लागि छाउमुक्त धारा निर्माण शुरु गरिएको हो ।

आगामी आर्थिक वर्षमा सबै वडा र वस्तीसम्म छाउमुक्त धारा निर्माण गरिने गाउँपालिकाले जनाएको छ ।