काठमाडौं– सरकारले विप्लव नेतृत्वको नेपाल कम्युनिस्ट पार्टी (नेकपा)माथि प्रतिबन्ध लगाएपछि विप्लव समूहले आह्वान गरेको नेपाल बन्दको काठमाडौं उपत्यकामा सामान्य प्रभाव पर्‍यो ।

मुलुकका अन्य केही जिल्लामा शंकास्पद वस्तु भेटिने र आगजनीका छिटपुट घटना घटेपनि काठमाडौंमा भने खासै प्रभाव परेन ।

पूर्व घोषित कार्यक्रम अनुसार विप्लव नेकपाले विहीबार नेपाल बन्द गरेको हो । तर मंगलबार सरकारले नेकपामाथि प्रतिबन्ध लगाएपछि बन्दको असर ठूलै पर्ने आकलन सर्वसाधारणले गरेका थिए ।

विहीबार विहान आंशिक मात्रामा सवारी साधन चलेपनि दिउँसो भने निर्वाध चलेका थिए । तर, सामान्य दिनभन्दा केही कम मात्रामा देखिए । गन्तव्यमा पुग्ने यात्रुका लागि यात्रा केही असहज बनेपनि सडक खाली हुँदा जामको सास्तीबाट भने उनीहरुले छुटकारा पाए ।

बन्दलाई लक्षित गरी काठमाडौंको सुरक्षा व्यवस्था भने कडा बनाइएको थियो । चोक चोकमा प्रहरीको तैनाथी थियो ।