काठमाडौं – केही दिनदेखि फिल्म ‘आफ्नो मान्छे’ को गीत ‘चट्ट रुमाल क्या मालुम’ चर्चामा छ । उक्त गीत सम्राट शाक्य निर्देशित फिल्म ‘यात्रा’ मा रिमेक भर्सनमा समावेश गरिएपछि पुरानो गीत पनि चर्चामा आएको हो ।

यो गीत सार्वजनिक भएपछि चर्चासँगै गीतको भिडियोलाई लिएर केही दर्शकले दुखेसो पोखेका छन् । दर्शकले रिमेक गीत वास्तविक गीतजस्तो  स्तरीय नभएको, गीतको मर्म बिग्रिएको भन्दै गाली समेत गरेका छन् ।

यसैबीच फिल्मका निर्देशक सम्राट शाक्यले गीतले दर्शकको चित्त बुझाउन नसकेकोमा माफी मागेका छन् । खबरहबसँगको भेटमा उनले आफूहरुले गीतमा नयाँ प्रयोग गर्न खोजेको तर दर्शकले पुरानो गीतलाई नभुलेको र सोही अनुसार नपाएकोमा आफूसमेत दुःखी भएको बताए ।

‘दर्शकले नेपाली सिनेमालाई निकै माया गर्नुहुँदो रहेछ, हामीले गीतमा नयाँपन दिन खोजेका थियौँ, तर दर्शकले पुरानो गीतलाई अझै सम्झिनुभएको रहेछ,’ निर्देशक शाक्यले भने, ‘यो गीतलाई हामीले अझै राम्रो बनाएर नयाँ तरिकाले प्रस्तुत गर्न खोजेका थियौँ, तर दर्शकले पुरानो ‘चट्ट रुमाल’ बिर्सिनुभएको रहनेछ ।’

साथै उनले कुराकानीमा दर्शकले आफ्नो आँखा खोलिदिएको पनि बताए । ‘दर्शकले आँखा खोलिदिनुभयो, निर्देशकका तर्फबाट मैले दर्शकसँग ‘सरी’ भन्छु ।’, उनले भने ।

फिल्म ‘यात्रा’ मा समावेश यो गीत रिलिज भएसँगै दर्शकले भिडियोमा पुरानो भिडियोले दिएको स्वाद पाउन सकेनन् । गीतमा हजारौँ नकारात्मक कमेन्ट आएपछि गीतमा स्वर दिएकी गायिका मेलिना राईले पनि सामाजिक सञ्जाल फेसबूकमा स्टाटस लेखेर गीत बिगारेको भन्दै आपत्ति जनाएकी थिइन् ।

म्युजिकल स्टोरी भनिएको यो फिल्ममा यात्राका क्रममा भेटिने कथालाई समेटिएको छ । फिल्ममा सलिनमान बनियाँ मुख्य आर्कषक बनेका छन् । सलिनसँगै मालिका महत, सलोन बस्नेत, रियर राई? प्रेक्षा बज्राचार्य, जाह्नवी बस्नेत, विशाल कटुवाल लगायतका कलाकारको अभिनय समेत फिल्ममा देख्न सकिनेछ ।

यस्तै चलचित्रमा चीनका जुन झाङ र केन्याका बोबीले पनि अभिनय गरेका छन् । फिल्ममा निर्माण सुशील पोखरेलको छ भने कथा तथा स्किृप्ट निर्देशक शाक्यको छ ।

नयाँ वर्षको मौका पारेर फिल्म यही चैत्र २९ गतेदेखि ‘यात्रा’ रिलिज हुँदैछ ।