काठमाडौं–पार्टीलाई विधि र विधानअनुसार सञ्चालन गर्ने प्रतिबद्धतासहित शेरबहादुर देउवा नेपाली कांग्रेसको सभापतिमा निर्वाचित भएको तीन वर्ष पुगेको छ । यो अवधिमा उनले पार्टीलाई विधि र विधानअनुसार सञ्चालन गर्न त सकेनन नै असन्तुष्ट पक्षलाई साथ लिएर संगठन चलाउन पनि असफल देखिएको नागरिक दैनिकमा खबर छ ।

महाधिवेशन भएको २ महिनाभित्र गठन गरिसक्नुपर्ने पार्टीका विभाग र निकायलाई अझै पूर्णता दिन नसकेको उनले ३ वर्ष कहिले सहमतिबाट त कहिले विधानको प्रावधानबाट अघि बढ्ने प्रयत्न गर्दै विताएका छन् । त्यसमा पनि कांग्रेसभित्रको समस्या भनेको गुटगत राजनीति हो । नेताहरुले एक अर्काका कमजोरी केलाउँदै आआफ्नो गुट बलियो बनाउनेतिर लागेपछि पार्टीभित्रको समस्या झन झागिँदै गएको छ ।

त्यस्तै विप्लवमाथिको प्रतिबन्ध निर्णयले नेकपामा असन्तुष्टि बढेको छ । सचिवालय सदस्यले नेकपा अध्यक्ष प्रचण्डसँग बेग्लै छलफल गरेका छन् । सरकारको निर्णयप्रति असन्तुष्टि प्रकट गर्दै माधव नेपाल, झलनाथ खनाल, वामदेव गौतम, नारायणकाजी श्रेष्ठ प्रचण्डलाई भेट्न खुमलटार पुगेका थिए ।

त्यस्तै अदालतमा बिचौलिया रोक्न निर्देशन शीर्षकको समाचारमा प्रधानन्यायाधीश चोलेन्द्रशमशेर जबराले अदालतमा बिचौलिया चिनेर रोक्न, न्यायाधीश र कर्मचारीको अनुशासनसमेत अनुगमन गरी प्रतिबेदन पेस गर्न मुख्य न्यायाधीशलाई अधिकारसहितको लिखित निर्देशन दिएका छन् ।