काठमाडौं- नेपाल आयल निगमले आगामी बैशाखबाट वातावरणमैत्री युरो ६ मापदण्डको इन्धन आयात गर्ने भएको छ ।

बैशाखदेखि सर्वसाधारणले समेत प्रयोग गर्न पाउने गरी युरो ६ मापदण्डको इन्धन ल्याउन लागिएको निगमका कार्यकारी निर्देशक सुरेन्द्र पौडेलले जानकारी दिए ।

इन्डियन आयल कर्पोरेसन (आईओसी) ले आफ्ना सबै रिफाइनरी केन्द्रमा युरो ६ मापदण्डको इन्धन अपग्रेड गर्ने भएपछि नेपालले पनि त्यही प्रकारको इन्धन ल्याउन लागेको निगमले जानकारी दिएको हो। नेपालले इन्डियन आयल कर्पोरेसन (आइओसी) बाट इन्धन आयात गर्दै आएको छ ।

निगमले असोज पहिलो सातादेखि नै युरो ६ मापदण्डको इन्धन प्रयोग गर्न चाहने व्यापारीलाई अनुमति पत्र दिँदै आएको छ। वैशाखदेखि भने सर्वसाधारणले समेत प्रयोग गर्न पाउने निगमले जनाएको छ ।

युरो ६ मापदण्ड इन्धन ल्याएपछि विस्तारै युरो ४ मापदण्डको इन्धन विस्थापित गर्दै लगिने छ ।

निगमका अनुसार हाल प्रयोगमा आइरहेको युरो ४ मापदण्डको इन्धनमा सल्फूरिक एसिड ५० पिपिए छ। युरो ६ मा १० पीपीएमात्रै हुन्छ। यसले वातावरण प्रदूषण कम गराउँछ।

हालको भन्दा गुणस्तरीय इन्धन आएपछि मूल्य पनि बढ्न सक्ने निगमले जनाएको छ।