काठमाडौं- मानव तस्करहरुले अमेरिका पुराइदिने भन्दै लगेका चार युवाको मलावीबाट उद्धार भएको छ। उद्धार भई स्वदेश फर्किनेहरु मानिरज रोकाया, रविन रेग्मी, नारायण आचार्य र सरोज जिसी छन्। उनीहरु सोमबार नेपाल आएका हुन्।

उनीहरुलाई गतवर्षको दशैंदेखि मानव तस्करहरुले अमेरिका छिराइदिने भन्दै नेपालबाट भियतनामको बाटो हुँदै लगेका थिए । उनीहरुलाई भियतनामबाट माडागास्कार, जोर्डन, दुबई, अजरबैजान हुँदै मलावी पुर्‍याइएको पीडितहरुले बताएका छन्।

उनीहरुलाई मलावीमा बन्धक बनाइएको सूचना पाएपछि नेपाल प्रहरीको अनुरोधमा मलावी प्रहरीले स्थानीय ब्लान्टायर शहरबाट उद्धार गरेर नेपाल फर्काइएको थियो।

अमेरिका छिर्ने प्रलोभनमा परेका युवाहरुले मानव तस्करहरुले अमेरिका छिराईदिने प्रलोभन दिएर आफुहरुको लाखौं रुपैयाँ लिएको बताएका छन्।