एजेन्सी- रोगको त्रासले सुँगुर मारिएपछि उत्तर कोरिया र दक्षिण कोरियाको सीमा नजिकै रहेको नदी इमजिन रगतले राताम्य भएको छ ।

सुँगुरमा अफ्रिकन स्वाइन फिवर फैलिने जोखिम बढेपछि दक्षिण कोरिया प्रशासनले सावधानीका लागि ४७ हजार सुँगुर मार्न आदेश दिएपछि त्यहाँका सुँगुर मारिएको थियी ।

मारिएका सुँगुरलाई सीमा नजिकैको डम्पिङ्ग साइडमा गाडिएको थियो । तर पानी परेकाले त्यहाँबाट रगत बगेर नजिकै रहेको सानो नदी इमजिनमा मिसियो । त्यसपछि नदीको पानी पूर्ण रुपमा रातो भएको हो ।

अफ्रिकन स्वाइन फिवर अति संक्रामक र उपचार सम्भव नभएको रोग हो । यसबाट संक्रमित भएका सुँगुर जीवित रहने सम्भावना हुँदैन । तर मानिसमा यसको संक्रमणको खतरा रहँदैन ।

तर नदी हुँदै बगेको रगतका कारण संक्रमण थप फैलिन सक्ने भन्दै चिन्ता व्यक्त गरिएको छ । स्थानीय अधिकारीले भने सो रगतका कारण अरु जनावरमा संक्रमण फैलिने जोखिन नरहेको दाबी गरेका छन् ।