काठमाडौं – नेपाल ओलम्पिक कमिटी (एनओसी) को निर्वाचन शनिबार शुरु हुनेछ । सातदोबाटोस्थित एनओसीको भवनमा हुने निर्वाचनले नयाँ कार्यसमिति चयन गर्नेछ ।

शनिबार बिहानका लागि तोकिएको निर्वाचनको अन्तिम दौड धुपमा विभिन्न पदमा उम्मेद्वारी दिएका व्यक्तिहरु लागि रहेका छन् । अध्यक्षका लागि संघिय संसदका सांसद तथा वर्तमान अध्यक्ष जिवनराम श्रेष्ठ र ब्यावसायी तथा पूर्व उपाध्यक्ष उमेशलाल श्रेष्ठको उम्मेद्वारी रहेको छ ।

यी दुई उम्मेद्वारले यसअघिको एनओसी र्विाचनमा पनि प्रतिस्पर्धा गरेका थिए । जहाँ जिवनराम श्रेष्ठले उमेशलाल केही भोटको झिनो अन्तरले पराजित भएका थिए ।

स्की संघका समेत अध्यक्ष रहेका जीवनराम दोस्रो कार्यकालका लागि चुनावी मैदानमा होकिइरहँदा उमेशलाल भने अघिल्लो पटकको बदला लिँदै एनओसीको अध्यक्ष बन्ने दाउमा छन् ।

जम्मा २७ जनाको मताधिकार रहेको एनओसीमा २६ जना कुनै न कुनै पदमा गरी उम्मेद्वार रहेका छन् । त्यसमध्ये २ पद कोषाध्यक्षमा रतन टण्डन र उपमहासचिवमा पिताम्बर तिम्सिना निर्विरोध भइसकेका छन् ।

बाँकी रहेका १७ पदका लागि अहिलेसम्म पनि उम्मेद्वारहरु भोटका लागि एकअर्कालाई आग्रह गरिरहेका छन् । अध्यक्षका प्रत्यासि दुवै उम्मेद्वारले आ–आफ्नो पक्षमा माहौल बनिरहेको दाबी गर्दै आएका छन् ।

सत्तारुढ दल नेकपाका कार्यकर्ता एनओसीको चुनावी मैदानमा तयार भइरहँदा पार्टी भित्रको गुटगत राजनीति एनओसीमा पनि स्पष्ट देखिएको छ । जसमा जीवनराम माधव कुमार नेपाल निकट हुन भने उमेशलाल अध्यक्ष तथा प्रधानमन्त्री केपी शर्मा ओली निकटका व्यक्ति हुन् ।

निर्वाचनले एक अध्यक्ष, पाँच उपाध्यक्ष, एक महासचिव, तीन सचिव र सात सदस्य चयन गर्नेछ ।