काठमाडौं– तत्कालीन संघीय समाजवादी फोरमबाट निर्वाचित (हाल समाजवादी पार्टीका) सांसद सूर्यनारायण यादव ‘सुरज’ले  सांसद पदबाट राजीनामा दिएका छन् । आफ्नो स्वास्थ्यका कारण सांसदको रुपमा काम गर्न असक्षम रहेको कारण देखाउँदै यादवले राजीनामा संघीय संसद सचिवालयमा आफ्ना राजीनामा पत्र दर्ता गराएका हुन् ।

यादवको राजीनामाबारे जानकारी भए पनि सभामुख कृष्णबहादुर महराले स्वीकृत भने नगरेको संसद सचिवालयले जनाएको छ ।

समाजवादी पार्टीका एक नेताका अनुसार यादवले १ वर्ष अघिदेखि नै राजीनामा दिने बताइरहेका थिए । पार्टीको कार्यशैलीप्रति चित्त नबुझेको भन्दै बेलाबेलामा उनले राजीनामा दिने बताउँदै आएको समाजवादी पार्टीका एक नेताले खबरहबलाई जानकारी दिए ।

‘उहाँ (यादव)ले विगत १ वर्षदेखि नै राजीनामा दिन भनेर भन्दै आउनुभएको थियो । अहिले आएर संसद सचिवालयमा राजीनामा दिएको भन्ने बुझिएको छ,’ नाम उल्लेख नगर्ने शर्तमा समाजवादी पार्टीका एक नेताले खबरहबसँग भने, ‘अहिले आएर उहाँले राजीनामा दिनुको कारण अरु पनि हुनसक्छ ।’

सप्तरी १ बाट निर्वाचित सांसद यादवको राजीनामा स्वीकृत उक्त क्षेत्रमा उपचुनाव गर्नुपर्नेछ ।