काठमाडौं– वैदेशिक रोजगार विभागले काठमाडौंको सिनामंगलस्थित एलाइन्स इन्टरनेशनल एजुकेशन कन्सलटेन्सीमा आकस्मिक छापा मारेको छ । उक्त सस्थाबाट विभागले नेपाली युवालाई साइप्रस पठाउने नाममा संकलित कागजातहरु जफत गरेको जानकारी दिएको छ ।

विभागको अनुगमन टोलीले साइप्रसमा रोजगारीमा जान दिएका निवेदनहरु, राहदानीको स्क्यान कपि, यसअघि कामदार भिसामा युरोपका विभिन्न मुलुकमा पठाइएका व्यक्तिहरुको विवरण फेला पारेको हो ।

अवैध रुपमा विदेश पठाउने प्रक्रिया सामेल भएको देखिएपछि कागजात, कम्प्युरको सिपियू लगायतका सामग्री जफत गरिएको र सो कन्सलटेन्सीका सञ्चालक सुजित कुमार श्रेष्ठलाई वयानका लागि पत्र दिइएको विभागले जनाएको छ ।

कन्सलटेन्सीले सामाजिक सञ्जालमार्फत युरोपका विभिन्न मुलुकमा रोजगारीका लागि पठाउने भन्दै विज्ञापन गरेको फेला परेको थियो । सोही विज्ञापनका आधारमा अन्तरवार्ता लिइरहेको भन्ने उजुरीका परेपछि विभागले प्रहरीको सहयोगमा छापा मारेको थियो ।

शैक्षिक परामर्श दिने भन्दै दर्ता गरिएका कन्सलटेन्सीहरुले विगत लामो समयदेखि अवैध रुपमा विदेश पठाउने काम गर्दै आएका थिए । विभागले यसरी काम गरिरहेका संस्थाहरुमा पनि छापा मार्न थालेको हो ।