एजेन्सी– भारतले फास्ट ट्रयाक प्रकृयामार्फत् अमेरिकी कम्पनीसँग ७ अर्ब भारतीय रुपैयाँ बराबरीको ७२ हजार ४ सय असल्ट राइफल खरिद सम्झौतामा हस्ताक्षर गरेको छ । यसबारे मंगलबार भारतीय रक्षामन्त्रालयले जानकारी दिएको छ । यि राइफलहरु अमेरिकी सुरक्षाबल सँगै केही युरोपेली देशका सेनाले पनि प्रयोग गर्दै आएका छन् ।

फास्ट ट्रयाक प्रोक्योर्मेन्ट एफटीपी प्रकृयामार्फत् एसआईजी जार असल्ट राइफल खरिदका लागि अमेरिकासँग सम्झौतामा हस्ताक्षर गरिएको भारतीय अधिकारीले जनाएका छन् । यस सम्झौताअनुसार एक वर्षभित्र भारतलाई अमेरिकाबाट ७४ हजार ४ सय ७.६२ एमएमका एसआइजी राइफल उपलब्ध हुनेछन् ।

राइफल ७ अर्ब भारतीय रुपैयाँको मूल्यमा खरिद गर्न लागिएको हो । अधिकारीहरुका अनुसार हाल भारतीय सशस्त्र बलले ५.५६×४५ एमएमको इन्सास राइफल प्रयोग गर्दै आएको छ । इन्सास राइफलको बदलामा अब ७.६२×५१ एमएमको असल्ट राइफल प्रयोग गर्नुपर्ने आवश्यकता महसुस हुन थालेको भारतीय अधिकारीहरु बताउँछन् । यि असल्ट राइफलहरु छोटो, ठोस, आधुनिक प्रविधिको तथा युद्धको परिस्थितीका लागि काममा ल्याउन पनि सहज रहेको बताइन्छ ।

यसअघि यसै महिनाको सुरुमा भारतीय रक्षामन्त्री निर्मला सीतारमणले असल्ट राइफल खरिदका लागि अनुमति दिएकी थिइन् । चीनको सीमामा तैनाथ सैनिकहरुले यी राइफलको प्रयोग गर्ने बताइएको छ । यसअघि सन् अक्टोबर २०१७ मा भारतीय सेनाले ७ लाख राइफल, ४४ हजार लाइट मेसिन गन एलएमजी, करिब ४४,६०० कार्बाइनको खरिद प्रकृया सुरु गरेको थियो ।