मोगादिशु– सोमालियाको एक होटेलमा गराइएको आक्रमणमा २६ जना मारिएका छन् ।

सोमालियाको स्वशासित क्षेत्र जुबाल्याण्डस्थित बन्दरगाह शहर किस्मायूको आलिशान होटेलमा बन्दुकधारीले गराएको आक्रमणमा अरु दर्जनौं घाइते भएका छन् ।

सोमाली अधिकारीका अनुसार मारिनेमा सोमालीसहित बेलायती, अमेरिकी, केन्याली तथा तान्जानियाका नागरिक छन् । त्यसबाहेक आगामी सोमाली राष्ट्रपतीय निर्वाचनमा उम्मेद्वारी दिएका नेता पनि आक्रमणमा मारिएको जनाइएको छ । मारिनेमा २ पत्रकार तथा संयुक्त राष्ट्रसंघमा कार्यरत समेत छन् ।

जुबाल्याण्डका अधिकारीले ४ आक्रमणकारीले स्थानीय होटेलमा आक्रमण गरेको बताएका छन् । तीमध्ये एकले आत्मघाती कार बम आक्रमण गराएका थिए । सुरक्षाकर्मीको जवाफी कारवाहीमा अन्य २ आक्रमणकारी मारिएको तथा अर्का एक आक्रमणकारीलाई जीवितै नियन्त्रणमा लिइएको छ ।

आक्रमणको जिम्मा सोमालियामा सक्रिय इस्लामिक लडाकु समूह अल शबाबले लिएको छ । आतंकवादी सञ्जाल अल कायदासँग आबद्ध अल शबाब समूहले सोमालियामा सैनिक तथा सर्वसाधारणलाई निशाना बनाएर बेलाबेला आक्रमण गर्दै आएको छ ।