मुम्बई – बलिउड अभिनेत्री कंगना रनावतको फिल्म ‘मणिकर्णिकाः द क्वीन अफ झाँसी’ बक्स अफिसमा सय करोड क्लबमा प्रवेश गरिसकेको छ । तर फिल्मको रेस्पोन्स भने औसत आएको छ । यही विषयलाई लिएर कंगना दुःखी छिन् ।

उनले पछिल्लो समय केही कलाकारलाई तोकेरै आफूलाई समर्थन नगरेको भन्दै विरोध समेत गरिन् । कंगनाको सपोर्टमा बलिउडकी अर्की चर्चित नायिका विद्या बालनले बोलेकी छिन् ।

विद्या बालनले एक अन्तर्वार्तामा मणिकर्णिकाको खुलेरै तारिफ गरिन् । ‘मैले हालै यो फिल्म हेरेँ, फिल्ममा देखिएको हार्डवर्कको कारण मलाई अचम्म बनायो, पूरै टिमलाई यसका लागि बधाई दिन चाहन्छु’, उनले भनिन्, ‘लामो समयदेखि कैयन् वार सीक्वेन्स फिल्म हेरेँ, तीमध्ये यो फिल्म सबैभन्दा राम्रो लाग्यो ।’

कंगना रनावतले यो फिल्ममा झाँसीको भूमिका निभाएकी छिन् । यो फिल्ममा कंगनाको भूमिकालाई फ्यानले भने तारिफ गरेका छन् ।

फिल्म रिलिजपछि कंगनाले आफूलाई कलाकारले सपोर्ट नगरेको भन्दै विरोध जनाएकी थिइन् । अर्की अभिनेत्री आलिया भाटलाई त उनले कठपुतली भनेरै आरोप लगाएकी थिइन् ।