काठमाडौं । धनगढी प्रिमियर लिग (डीपीएल) मा काठमाडौं गोल्डेन्सले लगातार दोस्रो खेलमा जीत हासिल गरेको छ । महेन्द्रनगर युनाइटेडमाथि ७ रनको रोमाञ्चक जीत हासिल गरेको लिगको दोस्रो स्थानमा उक्लिएको हो ।

टस हारेर पहिलो ब्याटिङको निम्तो पाएको काठमाडौंले दिएको १३५ रनको लक्ष्य पछ्याएको महेन्द्रनगरले २० ओभर पूरा खेल्दै ८ विकेट गुमाएर १ सय २७ रन मात्रै बनाउन सफल भयो ।

पहिलो खेलमा पनि हार बेहोेरेको महेन्द्रनगरका लागि अमरसिंह राउटेलाले नटआउट २८ रन बनाए पनि टिमलाई जीत दिलाउन सकेनन् ।

यस्तै, कप्तान शरद भेषावकरले २३ रन, आरिफ शेखले १८ रन, सुब्रमुनियम आनन्दले १५ रन तथा रोहित कुमार पौडेलले १० रन बनाए ।

महेन्द्रनगरविरुद्ध काठमाडौंका राशिद खानले उत्कृष्ट प्रर्दशन गरे । उनले ४ ओभर बलिङ गर्दै १७ रन खर्चेर ३ विकेट लिए । यस्तै, अङ्कित डबासले २ विकेट तथा नन्दन यादव, ललितनारायण राजवंशी र योगेन्द्र्रसिंह कार्कीले समान १—१ विकेट लिए ।

यसअघि टस हारेर पहिलो ब्याटिङको निम्तो पाएको काठमाडौंका लागि विदेशी खेलाडी अङ्कित डबासले सर्वाधिक ६५ रन बनाए भने योगेन्द्रसिंह कार्कीले २२ रन, कप्तान ज्ञानेन्द्र मल्लले १४ रन र मेहवुव आलमले १३ रन बनाए ।

काठमाडौंविरुद्ध महेन्द्रनगरका लागि अमरसिंह राउटेलाले २ तथा मोहमद नाभेद, अभिनास बोहरा र सागर ढकालले समान १—१ विकेट लिए ।

काठमाडौं गोल्डेन्स लगातार दुई खेलमा जीत निकाल्दै धनगढी प्रिमियर लिग (डीपीएल) मा दोस्रो स्थानमा उक्लिएको छ । दुई खेलबाट ४ अंक बनाएको काठमाडौं रन रेटका आधारमा भने समान ४ अंक भएको रुपन्देहीभन्दा तल छ ।