चीन– अमेरिकाले २ खर्ब अमेरिकी डलर बराबरको चिनियाँ सामानमा भन्सार शुल्क बढाएपछि चीनले पनि जवाफस्वरुप अमेरिकी सामानको आयातमा भन्सार बढाउने घोषणा गरेको छ ।

चीन सरकारको राज्य परिषद्को कर नीति आयोगले अब ६० अर्ब अमेरिकी डलर बराबरका ५ हजार भन्दा धेरै अमेरिकी उत्पादनमा भन्सार बढाइने जनाएको हो । ती सामानमा ५ देखि २५ प्रतिशतसम्म भन्सार शुल्क बढाइने अन्तर्राष्ट्रिय सञ्चारमाध्यमले जनाएका छन् । नयाँ नियम आगामी जुन १ बाट लागू हुनेछ ।

चीनले अमेरिकी सामानमा भन्सार बढाउनुअघि अमेरिकी राष्ट्रपति डोनाल्ड ट्रम्पले ट्विट गर्दै चिनियाँ सामानमाथि भन्सार शुल्क बढाउँदा अमेरिकी उपभोक्तालाई कुनै असर नपर्ने भन्दै चीनले अमेरिकी कदमको बदलामा अमेरिकी सामानमा भन्सार बढाउन नहुने बताएका थिए ।
त्यसअघि चिनियाँ विदेशमन्त्रालयले चीनले कुनै पनि वाह्य दबाबसामु आत्मसमर्पण नगर्ने जनाएको थियो ।

पछिल्लो समय विश्वको सबैभन्दा विशाल दुई अर्थतन्त्रहरु अमेरिका र चीनबीच व्यापारिक विषयमा वार्ता भइरहेका बेला एकले अर्को मुलुकविरुद्ध भन्सार शुल्क बढाएका हुन् ।