दक्षिण कोरिया– दक्षिण कोरियाका एकजना उच्च अधिकारी उत्तर कोरियाको आणविक निशस्त्रीकरण प्रक्रियाबारे छलफल गर्न अमेरिका प्रस्थान गरेका छन् ।

उत्तर कोरियाको आणविक निशस्त्रीकरणबारे अमेरिकी अधिकारीसँग प्रत्यक्ष वार्ता गर्नका लागि दक्षिण कोरियाली विदेशमन्त्रालय अन्तर्गतको शान्ति सम्बन्धी महानिर्देशक रि डोङ योल अमेरिका प्रस्थान गरेका हुन् ।

उनले उत्तर कोरियाको आणविक निशस्त्रीकरणका सम्बन्धमा उत्तर कोरियाका लागि विशेष अमेरिकी प्रतिनिधि एलेक्स वोङसँग छलफल गर्ने कार्यक्रम छ । त्यस छलफलका क्रममा दक्षिण कोरिया तथा अमेरिकाका उत्तर कोरियाली मामिलासँग सम्बन्धित वरिष्ठ पदाधिकारी पनि सहभागि रहने अन्तर्राष्ट्रिय सञ्चारमाध्यमले जनाएका छन् ।

अघिल्लो महिना उत्तर कोरियाली सर्वोच्च नेता किम जोङ उन तथा अमेरिकी राष्ट्रपति डोनाल्ड ट्रम्पबीच भियनामको राजधानी हनोईमा भएको दोश्रो शिखर वार्ता बिना निष्कर्ष टुङ्गिएपछि दक्षिण कोरियाली तथा अमेरिकी वरिष्ठ अधिकारीबीच हुन लागेको यो पहिलो छलफल हो ।