काठमाडौं–प्रतिनिधिसभा र राष्ट्रियसभा दुवैका सदनको बैठक आज (बुधबार) बोलाइएको छ । प्रतिनिधिसभाको बैठक मध्यान्ह १२ बजेका लागि बोलाइएको छ भने, राष्ट्रियसभाको बैठक दिउँसो एक बजे बस्ने संसद सचिवालयले जनाएको छ ।

राष्ट्रियसभाको आजको बैठकमा राष्ट्रियसभाका सचिव राजेन्द्र फुयालले प्रतिनिधिसभाबाट सन्देशसहित प्राप्त ‘विशेष आर्थिक क्षेत्र (पहिलो संशोधन) विधेयक २०७५’ र ‘भूउपयोग विधेयक २०७५’लाई टेबुल गर्ने कार्यसूची छ ।

त्यस्तै बैठकमा युवा तथा खेलकुदमन्त्री जगतबहादुर सुनार (विश्वकर्मा)ले राष्ट्रिय खेलकुद विकास विधेयक २०७५ माथि विचार गरियोस भन्ने प्रस्ताव प्रस्तुत गर्ने कार्यसूची रहेको संघीय संसदका महासचिव मनोहप्रसाद भट्टराईले जानकारी दिए ।