काठमाडौं– अखिल नेपाल फुटबल संघ (एन्फा)ले नेपाली राष्ट्रिय फुटबल टोलीका चार खेलाडीमाथि प्रतिबन्ध लगाएको छ । स्टार खेलाडी विमल घर्ती मगर, दिनेस राजवंशी, अञ्जन बिष्ट र सन्तोष तामाङमाथि एन्फाले प्रतिबन्ध लगाएको हो ।

एन्फाले शुक्रबार चार खेलाडीलाई कारबाहि गरेको जनाएको छ । फिफा विश्वकप २०२२ तथा एएफसी कप २०२३ को छनोट अन्तर्गत कुवेत विरुद्धको खेल अगाडि उनीहरुले गरेको व्यवहारका कारण उनीहरुमाथि कारबाहि गरिएको एन्फाले जनाएको छ ।

चारै जना खेलाडी कुवेतविरुद्वको होम गेमका लागि भुटान जाने अघिल्लो राति ठमेल नाइट क्लबमा भेटिएपछि उनीहरुमाथि अनुसन्धान भइरहेको थियो।

एन्फाका अनुसार आजैदेखि लागुहुने गरी विमल र दिनेशमाथि ९० दिनको प्रतिबन्ध लगाइएको छ । त्यस्तै, अञ्जन बिष्ट र सन्तोष तामाङलाई ४५ दिनको प्रतिबन्ध लगाएको एन्फाले जनाएको छ।

प्रतिबन्धसँगै यी खेलाडीहरुले ५० हजार नगद जरिवाना तिर्नु पर्नेछ।