काठमाडौं– सवारी साधनमा प्रयोग गरिन थालिएको उच्च प्रविधियुक्त इम्बोस्ड) नम्बरप्लेटविरुद्ध सर्वोच्च अदालतमा दायर रिट खारेज भएको छ ।

प्रधानन्यायाधीश चोलेन्द्र शम्शेर राणा नेतृत्वको संवैधानिक इजलाशले शुक्रबार रिट खारेजको फैसला गरेको हो ।

अधिवक्ता भरत कुमार बस्नेतसहितले ६ फागुन २०७४ मा इम्बोस्ड नम्बर प्लेटको कार्यान्वयन स्थगितको माग राख्दै सर्वोच्चमा रिट दायर गरेका थिए ।

बस्नेतले दायर गरेको रिटमाथि प्रारम्भिक सुनुवाई गर्दै सर्वोच्च अदालतका तत्कालीन न्यायाधीश गोपाल पराजुलीको इजलाशले १० फागुन २०७४ मा सरकारका नाममा कारण देखाउ आदेश जारी गर्दै इम्बोस्ड नम्बर प्लेट जडान गर्ने कार्य रोक्न भनेको थियो ।

पराजुलीको इजलाशले जारी गरेको आदेशसँगै सवारीसाधानमा इम्बोस्ड नम्बर प्लेट जडान गर्ने कार्य रोकिएको थियो ।

पछि, गोपाल पराजुली र दीपकराज जोशीको २२ फागुन २०७४ को संयुक्त इजलाशले इम्बोस्ड नम्बर प्लेटसँग सम्बन्धित सम्पूर्ण कागजातसहितको मिसिल झिकाउने आदेश जारी गरेको थियो ।

त्यसयता १० पटक पेशीमा नचढेको उक्त रिटमाथि शुक्रबार अन्तिम फैसला सुनाउँदै सर्वोच्चको संवैधानिक इजलाशले रिट नै खारेज गरिदिएको हो ।

सर्वोच्चको फैसलासँगै अब इम्बोस्ड नम्बर प्लेट जडानको कार्य शुरु गर्न बाटो खुलेको यातायात व्यवस्था विभागका एक अधिकारीले जानकारी दिए ।