काठमाडौं– राजस्व छलि अभियोगमा तीन जनाविरुद्ध  ११ करोड बढीको विगो दाबीसहित ३ जनाविरुद्ध काठमाडौं जिल्ला अदालतमा मुद्दा दर्ता भएको छ ।

राजस्व अनुसन्धान विभागले झुटा तथा नक्कली विजक प्रयोग गरी राजस्व छलि गरेको अभियोगमा उनीहरुविरुद्ध मुद्दा दर्ता गरेको हो ।

विभागले हस्पी केयर इन्टरनेशनलमा कारोवार गर्ने फरार मुख्य व्यक्ति केशव वंशल, फर्मका प्रोप्राईटर रामसुन्दर रायभर र श्री श्याम ट्रेडर्सका प्रोप्राईटर राकेश पाण्डेयविरुद्ध कर छली अभियोगमा मुद्दा दर्ता गरेको जनाएको छ ।

विभागले उनीहरुविरुद्ध ११ करोड १९ लाख ८४ हजार १ सय ६४ रुपैयाँ विगो कायम गरी विगोको दोब्बरसम्म जरिवाना र ३ वर्षसम्म कैद सजायको माग दाबी गरेको छ ।

उनीहरुले वस्तु तथा सेवा खरिद नै नगरी झुटा तथा नक्कली मुल्य अभिवृद्धि कर विजक मात्र खरिद गरी मूल्य अभिवृद्धि कर र आयकर समेतको राजस्व चुहावट गरेको विभागले जनाएको छ ।

भारतीय नागरिक बंशलले राजस्व चुहावट गरी आर्जन गरेको रकमबाट खरिद गरेको घर, जग्गा तथा सवारी साधनहरु नेपाली नागरिकहरुको नाममा दर्ता गरी भोगचलन गर्ने गरेको विभागले जनाएको छ ।

प्रतिवादीहरुले मु.अ.कर तर्फ ३ करोड १२ लाख १९ हजार ९ सय ५९ रुपैयाँ र आयकर तर्फ ८ करोड ७ लाख ६४ हजार २ सय पाँच रुपैयाँ राजस्व चुहावट गरेको अनुसन्धानबाट खुलेको छ ।