काठमाडौं- सन् २०२० मा आयोजना हुने युरोकप छनोटमा फ्रान्सले आइसल्याण्डलाई पराजित गरेको छ ।

विश्व विजेता फ्रान्सले आइसल्याण्डविरुद्ध साँघुरो जित निकालेको हो ।

छनोट अन्तर्गत शुक्रबार राति भएको समूह चरणको खेलमा फ्रान्सले आइसल्याण्डलाई १-० गोल अन्तरले पराजित गर्‍यो ।

आइसल्याण्डको मैदानमा भएको खेलमा फ्रान्सलाई जिताउन ओलिभर जेरुड नायक बने । जेरुडको एक मात्रमा गोलमा फ्रान्सले ३ अंक जोडेको छ ।

पहिलो हाफ गोलरहित बराबरीमा सकिएको खेलको ६६ औं मिनेटमा जेरुडले पेनाल्टीमा गोल गरेका थिए । उक्त गोल नै फ्रान्सको जितमा निर्णायक बन्यो । फ्रान्सका लागि उनको यो ३७ औं गोल हो ।

जितसँगै समूह ‘एच’ को फ्रान्सले युरोकपमा छनोट हुने सम्भावना बलियो बनाएको छ । फ्रान्सले ७ खेलबाट १८ अंक जोडेर समूहको दोस्रो स्थानमा छ ।

१२ अंक जोडेको आइसल्याण्ड तेस्रो स्थानमा छ ।