काठमाडौं– नेपाल कम्युनिस्ट पार्टी (नेकपा)का अध्यक्ष पुष्पकमल दाहाल र चिनियाँ विदेशमन्त्री वाङ यीबीच ‘इन्डो–प्यासिफिक स्ट्राटेजी’ सम्बन्धमा भएको कुराकानीलाई लिएर अमेरिकी राजदूतले आपत्ति जनाएका छन्।

बिहीबार परराष्ट्र मन्त्रालयमा सचिव शंकरदास बैरागीलाई भेटेर अमेरिकी राजदूत  र्‍यान्डी डब्लु बेरीले आपत्ति जनाएका हुन्। उनेल नेपाल र अमेरिकाबीचको सम्बन्ध चिनियाँ विदेश मन्त्रालयको विज्ञप्तिमा आउँदा दुःख लागेको बताए ।

चिनियाँ विज्ञप्तिको विषयलाई लिएर राजदूतले बेरीले परराष्ट्र सचिवसँग दुई देशबीचको कुरा तेस्रो देशको विज्ञप्तिमा कसरी पर्न गयो भन्ने विषयमा जिज्ञासा राखेको परराष्ट्र मन्त्रालय स्रोतले जानकारी दियो ।

नेपालका लागि अमेरिकी राजदूत बेरी र काठमाडौंस्थित अमेरिकी दूतावासका उपनियोग प्रमुख म्यानुएल पी. मिक्कलर परराष्ट्र सचिवलाई भेट्न बिहीबार परराष्ट्र मन्त्रालय पुगेका थिए।

चिनियाँ विदेशमन्त्रीको नेपाल भ्रमणका क्रममा प्रचण्डसँगको भेटवार्ता सम्बन्धी चिनियाँ विदेश मन्त्रालयले विज्ञप्ति जारी गरेको थियो।