काठमाडौं– चीनको हाईनान प्रान्तमा हुने एकल देशीय मेलामा नेपालबाट साना तथा मझौला व्यवसायीहरुले सहभागीता जनाउने भएका छन् ।

साना तथा मझौला व्यवसायी महासंघले बिहीबार राजधानीमा पत्रकार सम्मेलन गरी चीनको हाईनान प्रान्तमा हुने प्रर्दशनीमा आफ्ना उत्पादनका साथ सहभागी हुन सबै साना तथा मझौला व्यवसायीलाई आव्हान गरेको हो ।

महासंघका प्रथम उपाध्यक्ष इनु पौडेलले चीनको एक स्थानीय कम्पनी र महासंघबीचको साझेदारीमा हाईनान प्रान्तको व्यापारिक भवनमा नेपाली व्यवसायीले झण्डै ८० वटा स्टल राख्न पाउने व्यवस्था भएकाले आफ्ना उत्पादनसहित सहभागी भई बजारीकरणको सही सदुपयोग गर्न सबैलाई आव्हान गरिन् ।

चीनमा हुने अधिकांश मेलामा साना तथा मझौला व्यवसायीहरुको उत्पादनको प्रर्दशनी र बिक्री हुँदै आएको छ । यो मेला पछाडी हाईनान प्रान्तको व्यापारिक भवनमा नेपाली उद्योगीहरुका लागि कम्तीमा ५० वटा स्टल चीन सरकारले स्थायी रुपमा उपलब्ध गराउने भएको छ ।