रौतहट– दुई धार्मिक समुदायबीचको विवादले उग्ररुप लिँदा रौतहटको कुडियाबजार क्षेत्रमा तनावग्रस्त बनेको छ । दुई पक्षबीचको झडपले उग्ररुप लिएपछि नियन्त्रणका लागि प्रहरीले हवाईफायर समेत गरेको छ ।

बिहीबार दिउँसो स्थानीयको झडप नियन्त्रणबाहिर गएपछि प्रहरीले ३० राउण्ड हवाईफायर र त्यतिनै संख्यामा अश्रुग्यास प्रहार गरेको थियो ।

कुडियाबजार नजिकै रहेको पोखरी छेऊमा मुस्लिम समुदायले गाडेको झण्डा निकालेको विषयलाई लिएर विवाद उत्पन्न भएको थियो ।

त्यसअघि बुधबार साँझ छठ पर्व मनाउनेहरुले बनाएको श्री सप्ताह मूर्ति तोडफोड भएको थियो । मूर्ति तोडफोड भएको र त्यहीँ ठाउँमा मुसलमान समुदायले झण्डा गाडेको देखिएपछि दुई समुदायबीच विवाद सुरु भएको हो ।

विवाद समाधानका लागि स्थानीय प्रहरी प्रशासनले बिहीबार बिहान मुस्लिम अगुवाहरुसँग छलफल गरी पोखरी किनारमा गाडिएको झण्डा हटाएको थियो । उक्त झण्डा हटाएको विरोधमा बिहीबार दिउँसो कुडियाबजारमा मुस्लिम समुदायले प्रदर्शन गरेका थिए ।

एउटा पक्षले निकाले प्रदर्शनमा अर्को पक्षले हस्तक्षेप गर्दा स्थिति तनावपूर्ण बनेको प्रहरीले जनाएको छ । प्रदर्शनकारीले प्रहरीको गाडीमा पनि ढुंगामुढा गरेका छन् ।