काठमाडौं– स्वास्थ्यमा समस्या देखिएपछि अस्पताल भर्ना भएका नेपाली कांग्रेसका नेता प्रकाशमान सिंह सोमबार डिस्चार्ज भएका छन् ।

‘हाई सुगर’, उच्च ज्वरो र पिसाबमा संक्रमण देखिएपछि गत सोमबार मेडिसिटी अस्पताल भर्ना भएका सिंहको स्वास्थ्यमा सुधार भएपछि अस्पतालबाट घर फर्किएको उनका स्वकीय सचिव युपी लामिछानेले जानकारी दिए ।

चिकित्सकको सल्लाहअनुसार सिंहले अझै केही दिन घरमै बसेर पूर्ण आराम लिने लामिछानेले बताए ।

उपचारपछि घर फर्कने क्रममा सिंहले आफ्नो उपचारमा संलग्न चिकित्सक टिम, अस्पताल व्यवस्थापन, आफ्नो स्वास्थ्यप्रति चासो राख्नु हुने स्वदेश तथा विदेशमा रहेका आफन्त, साथीभाइ, शुभचिन्तकहरु, पार्टीका नेता तथा कार्यकर्ता र संचारकर्मीहरु सबैमा हार्दिक आभारसहित धन्यवाद व्यक्त गरेका छन् ।

केही दिन घरमा आराम गरेर पार्टीको काममा फर्कने उल्लेख गर्दै उनले अस्पतालमा रहँदा सबैसँग भेटघाट गर्न नमिलेको प्रति दुःख व्यक्त गरेका छन् ।