दोहा– खाडी क्षेत्रलाई अझ खतरनाक बनाएको इरानी विदेशमन्त्री जवाद जरिफले आरोप लगाएका छन् ।

कतारको अल जजिरा टेलिभिजनलाई दिएको अन्तरवार्ताका क्रममा विदेशमन्त्री जरिफले अमेरिकाले खाडी क्षेत्रलाई ‘प्रज्वलनशील बनाएको’ र ‘सलाई बाल्न’ मात्र बाँकी रहेको आरोप लगाएका हुन् । उनले अमेरिकाले त्यस क्षेत्रमा हतियारको होडबाजी शुरु गरेको आरोप समेत लगाए ।

पछिल्लो समय खाडी क्षेत्रमा तेल बोकेका ट्यांकरहरु असुरक्षित बन्न थालेपछि अमेरिका र बेलायतसहितका मुलुकले पानीजहाजलाई जोगाउन नौसैनिक गतिविधीलाई बढाएपछि इरानी विदेशमन्त्रीको यस्तो भनाइ सार्वजनिक भएको हो । उनले पश्चिमा मुलुकहरुको उपस्थितीका कारण विदेशी व्यावसायिक पानीजहजाका लागि अझ असुरक्षित बन्दै गएको टिप्पणी समेत गरे ।

गत मे र जुन महिनामा खाडीक्षेत्रमा ६ वटा ट्यांकरमा आक्रमण भएका थिए । अमेरिका तथा त्यस क्षेत्रमा रहेका अमेरिकी साझेदार मुलुकहरुले आक्रमणमा इरानको संलग्नता रहेको आरोप लगाउँदै आएका छन् । त्यसबाहेक इरानले केही समयअघिमात्र बेलायतको ध्वजावाहक ट्यांकर नियन्त्रणमा लिएपछि इरान र पश्चिमा मुलुकबीचको सम्बन्ध चिसिँदै आएको छ ।

पश्चिमा मुलुकसँग इरानको सम्बन्ध चिसिएका बेला इरानी विदेशमन्त्रीको यस्तो भनाइ आएको हो । इरानी विदेशमन्त्री आइतबारमात्र कतारको राजधानी दोहा पुगेको तथा सोमबार उनले त्यहाँका अमिर तमिम बिन हमाद अल थानीसँग भेटवार्ता गरेको बताइएको छ ।