काठमाडौं– १ जनाको ज्यान जाने गरी सवारी दुर्घटना गराउने चालकलाई जोगाउन खोज्ने प्रहरी निरीक्षक (इन्सपेक्टर)विरुद्ध भ्रष्टाचार मुद्दा दर्ता भएको छ ।

अख्तियार दुरुपयोग अनुसन्धान आयोगले इलाका प्रहरी काकर्यालय गैंडाकोट (नवलपरासी)का तत्कालीन प्रमुख (इन्सपेक्टर) लोकबहादुर जिसीसहित दुर्घटना गराउने चालक बोधराज पाण्डे र आफूले उक्त गाडी चलाएको भनेर बयान दिने ‘नक्कली चालक’ किशुना महतोविरुद्ध भ्रष्टाचार मुद्दा दायर गरेको हो ।

गत वैशाख १२ गते पूर्व–पश्चिम राजमार्गअन्तर्गत गैँडाकोट–२ स्थित भृकुटी चोकमा बा२०च ११७९ नम्बरको जीपको ठक्करबाट ना २८ प ४६८५ नम्बरको मोटरसाइकल चालक कमल शर्माको मृत्यु भएको थियो ।

प्रहरीले जीप चालक बोधराज पाण्डेलाई नियन्त्रणमा लिएर अनुसन्धान प्रक्रिया थालेकोमा प्रहरी इन्सिपेक्टर लोकबहादुर जिसीले नक्कली चालक खडा गरेर पाण्डेलाई जोगाउन खोजेका थिए ।

नक्कली चालकलाई केही रकम दिएर पाण्डेले आफू सवारी ज्यानसम्बन्धी मुद्दाबाट उम्किन खोजेका थिए । जसका लागि इन्सपेक्टर जिसीले नै किशुना महतोलाई नक्कली चालकको रुपमा खडा गरेका थिए ।

अख्तियारले तीनैजनाविरुद्ध १ वर्ष कैद र १० हजार रुपैयाँ जरिवाना मागदावी गर्दै शुक्रबार विशेष अदालतमा मुद्दा दायर गरेको छ ।