एजेन्सी– निर्वासित कम्युनिष्ट छापामार नेतालाई आफ्नो मुलुक सुपुर्दगी गर्न इटालीले फ्रान्ससमक्ष आग्रह गरेको छ । इटालियन तथा फ्रेन्च न्यायमन्त्रीहरुबीचको वार्ताका क्रममा कम्युनिष्ट छापामार नेतालाई सुपुर्दगी गर्ने विषयमा कुरा उठेको हो ।

यसअघि इटालीका दक्षिणपन्थी उपप्रधानमन्त्री मात्तेयो साल्भिनीले फ्रान्सेली राष्ट्रपति इम्मानुएल म्याक्रोंसमक्ष छापामार नेताहरुलाई सुपुर्दगीको आह्वान गरेक थिए । फ्रान्समा निर्वासित इटालीका कम्युनिष्ट नेताहरुविरुद्ध सन् १९६० को दशकदेखि ८० को दशकसम्म चलेको ‘यियर्स अफ लिड’ का समयमा विभिन्न आक्रमणमा संलग्न रहेको आरोप लाग्दै आएको छ ।

यसअघि इटालीले एकजना छापामार नेतालाई सुपुर्दगीको औपचारिक आग्रह गरेको र दोश्रो औपचारिक आग्रह चाँडै हुनसक्ने अनुमान गरिएको छ । इटालीको औपचारिक आग्रहका विषयमा बुधबार बैठक बस्ने फ्रेन्च अधिकारीले जनाएका छन् ।

‘यियर्स अफ लिड’ को समयमा उग्र बामपन्थी तथा उग्र दक्षिणपन्थी पार्टीका कार्यकर्ताबीच भएका हत्या, हिंसा अपहरण र अन्य सामाजिक अपराधका क्रममा सयौँ जनाको ज्यान गएको थियो ।

सन् १९७८ मा तत्कालीन इटालियन प्रधानमन्त्री अल्डो मोरोको अपहरणमा संलग्न तीनसहित ९ जना छापामार नेताहरु फ्रान्समा लुकेर बसेको इटालीको ला रिपब्लिका समाचारपत्रले जनाएको छ । यसअघि हालै एकजना बामपन्थी नेता आजीवन कारावासको सजाय व्यहोर्न इटाली पुगेका थिए ।