काठमाडौं– भुवन कार्कीको उत्कृष्ट बलिङ प्रेरित सिवाईसी अत्तरियाले धनगढी स्टार्सविरुद्ध ५ रनको रोमाञ्चक जित हात पारेको छ ।

फाप्ला क्रिकेट मैदानमा भएको खेलमा अत्तरियाले दिएको ९६ रनको लक्ष्य पछ्याएको धनगढीले २० ओभर पूरा खेल्दै ९ विकेट गुमाएर ९० रन मात्रै बनाउन सक्यो ।

योसँगै धनगढीले लगातार दुई खेलमा पराजय बेहोरेको छ भने अत्तरियाले प्रतियोगितामा सुखद् सुरुवात गरेको छ । धनगढीविरुद्ध अत्तरियाका सन्नी पटेलले अलराउन्ड प्रदर्शन गरे भने बलर हावी भएपछि ९० रन समेटिएको हो ।

धनगढीका लागि नटआउट रहेका राजु रिजालले २६ रन, रोहन मुस्तफाले १८ तथा सन्दीप रजाइलीले ११ रन बनाए भने कप्तान सोमपाल कामीले १० रन बनाउनु बाहेक अन्यले दोहोरो अंक जोड्न सकेनन् ।

धनगढीविरुद्ध अत्तरियाका भुवन कार्कीले उत्कृष्ट बलिङ गरे । उनले ४ ओभर बलिङ गर्दै १० रन खर्चेर ४ विकेट लिए । त्यस्तै, सन्नी पटेलले ४ ओभर बलिङ गर्दै १७ रन खर्चेर २ विकेट लिए भने कप्तान दीपेन्द्रसिंह ऐरी र दीपेन्द्र राउतले समान १—१ विकेट लिए ।

यसअघि, टस जितेर पहिलो ब्याटिङ गरेको अत्तरियाका लागि सन्नी पटेलले उत्कृष्ट ब्याटिङ गरे । उनी नटआउट रहँदै ३५ रन बनाए । यस्तै, ओपनिङ ब्याट्सम्यान जयकिसन कोल्सावालाले २१ तथा प्रेम तामाङ १२ रन र कप्तान दीपेन्द्रसिंह ऐरीले ११ रन बनाएका थिए ।

अत्तरियालाई ९५ रनमा समेट्न धनगढीका रोहन मुस्तफाले उत्कृष्ट बलिङ गरेका थिए । उनले ४ ओभर बलिङ गर्दै १४ रन खर्चेर २ विकेट लिए भने कप्तान सोमपाल कामी,अमिर हायत, विपीन खत्र्रीले समान १—१ विकेट लिए ।