नूरसुल्तान– कजाखस्तानको इतिहासकै दोश्रा राष्ट्रपतिका रुपमा कसिम जोमार्ट टोकाएभले सपथ लिएका छन् । राजधानी नूरसुल्तानमा प्रहरीको बाक्लो उपस्थितीमा टोकाएभले मुलुकको दोश्रो राष्ट्रपतिका रुपमा बुधबार सपथ ग्रहण गरेका हुन् ।

गत आइतबार त्यहाँ भएको निर्वाचनमा टोकाएभ विजयी भएको औपचारिक घोषणापछि उनले राष्ट्रपतिको सपथ ग्रहण गरेका हुने । निर्वाचनका क्रममा भएको प्रदर्शनका क्रममा प्रहरीले ५ सय जनाभन्दा धेरैलाई नियन्त्रणमा लिएको थियो । यसअघि मुलुकका पहिलो राष्ट्रपति नूरसुल्तान नजरबयेभले गत मार्चमा एक्कासी पदबाट राजीनामा दिएपछि उनको स्थानमा टोकाएभ राष्ट्रपति बनेका थिए ।

कजाखस्तानले तत्कालिन सोभियत संघबाट स्वतन्त्रता पाएयता सन् १९९१ देखि नजरबयेभ त्यहाँका राष्ट्रपति रहँदै आएका थिए । नवनिर्वाचित राष्ट्रपति टोकाएभले पनि नजरबयेभकै परिकल्पनाअनुसार कजाखस्तानको विकास र समृद्धिलाई निरन्तरता दिने बाचा गरेका छन् ।

नजरबयेभको शासनकालमा कजाखस्तानमा मानअधिकार तथा अन्य स्वतन्त्रतामाथि अंकुश लाग्दै आएको भन्दै आलोचना हुने गरेको छ ।