काठमाडौं- गुठी विधेयकविरुद्ध प्रदर्शनमा उत्रेका प्रदर्शनकारीमाथि प्रहरीले गरेको हस्तक्षेपप्रति विप्लव नेतृत्वको नेकपाले भत्र्सना गरेको छ ।

नेपाल कम्युनिस्ट पार्टीका प्रवक्ता प्रकाण्डले बुधबार प्रेस विज्ञप्ति जारी गर्दै गुठी विधेयकविरुद्ध प्रदर्शनमा उत्रेका जनताहरुलाई गृह प्रशासनद्वारा गरेको बर्बर दमनप्रति घोर आपत्ति र निन्दा गरेका छन् ।

विज्ञेप्तीमा भनिएको छ, ‘सामाजिक दलाल सरकार एकपछि अर्को गरी जनअधिकार कुल्चिदै फासिवादको अभ्यास गरिराखेको छ । यसै गरी सदनमा प्रस्तुत गरिएको गुठी विधेयक पनि एउटा यसैको उदाहरण हो ।’

गुठीलाई आधुनिकीकरण र न्यायपूर्ण परिचालन पर्ने तर्क गर्दै ‘तर पछिल्लो समय गुठी व्यवस्थित गर्ने नाममा सरोकारवाला पक्षसँग छलफलै नगरी नागरिकको सांस्कृतिक भावनाको कदर र सम्पूर्ण सुरक्षाको योजना नबनाई किन विधेयक निर्माण गरिदैछ’ भनिएको छ ।

विज्ञप्तिमा भनिएको छ, ‘तसर्थ यसको विरुद्ध उठेका जनताको शान्तिपूर्ण र बैधानिक संघर्षमा जुन बर्बर दमन भयो हाम्रो पार्टी त्यस खाले दमनको घोर निन्दा गर्दछ ।’

साथै विप्लव नेकपाले उक्त वैधानिक र न्यायपूर्ण आन्दोलनमा घाइते भएकाहरुको उचित उपचारको व्यवस्थापन गर्न र न्यायपूर्ण समाधानका लागि जोडदार माग गरेको छ ।