काठमाडौं- प्रधानमन्त्री महिला क्रिकेट प्रतियोगिताको खेल तालिका सार्वजनिक भएको छ । कञ्चनपुरको महेन्द्रनगरमा आयोजना हुने प्रधानमन्त्री कप महिला टी–ट्वान्टी क्रिकेट प्रतियोगिताको उद्घाटन खेलमा गण्डकी प्रदेश र सुदूरपश्चिम प्रदेशले प्रतिस्पर्धा गर्नेछन् ।

आयोजक महाकाली स्पोर्ट्स सोसाइटीले बुधबार निकालेको खेल तालिका अनुसार उद्घाटन खेल असार ४ गते महेन्द्रनगरमा हुनेछ । ४ गते नै अर्को एक खेल हुनेछ जसमा प्रदेश २ र कर्णाली प्रदेशबीच हुनेछ ।

प्रतियोगितामा ८ महिला टिमको सहभागिता रहनेछ । जसमा सात प्रदेश र एक विभागीय टिम छन् । विभागिय टोलीबाट एपीएफको सहभागिता जनाएको हो । प्रतियोगितामा दैनिक दुई खेल हुनेछन् । समूह ए मा एपीएफ क्लब, सुदूरपश्चिम क्लब, प्रदेश नम्बर ५ र गण्डकी प्रदेश रहेका छन् भने समूह बी मा प्रदेश नम्बर १,२,३ र कर्णाली प्रदेश रहेका छन् । पहिलो खेल बिहान ८ बजे शुरु हुनेछ भने दोस्रो खेल दिउँसो ३ बजे शुरु हुनेछ ।

८ टोलीलाई २ समूह विभाजन गरेर प्रतियोगिता आयोजना गरिँदैछ । प्रतियोगिताको विजेताले ५ लाख र उपविजेताले ३ लाख पाउने छ । प्रतियोगिताको सर्वोत्कृष्ट खेलाडीले ३० हजार पाउने छन् । यस्तै विधागत रुपमा उत्कृष्ट हुनेले १५–१५ हजार पाउने आयोजकले जनाएको छ ।