मुम्बई – सलमान खान अभिनित फिल्म ‘भारत’ ले बक्स अफिसमा उत्साहजनक व्यापार गरेको छ । मिश्रित समीक्षा पाएको यो फिल्मले बक्स अफिसमा भने निरन्तर कमाइ गरिरहेको छ ।

बक्स अफिसमा ४२ करोड ३० लाखसहित ओपनिङ गरेको यो फिल्मले ७ दिनमा १ सय ६७ करोड ६० लाखको व्यापार गरेको भारतीय सञ्चार माध्यमले जनाएका छन् । इदको अवसर पारेर बुधवार नै रिलिज भएको यो फिल्मले बिहीवार ३१ करोड र शुक्रवार २२ करोड २० लाख कमाइ गरेको थियो ।

यस्तै फिल्मले शनिवार २६ करोड ७० लाख, आइतवार २७ करोड ९० लाख, त्यस्तै सोमवार ९ करोड २० लाख र मंगलवार ८ करोड ३० लाखको व्यापार गरेको हो ।

सलमान खानको शीर्ष भूमिका रहेको यो फिल्ममा क्याटरीना कैफ, दिशा पटानी, सुनील ग्रोबर लगायतका कलाकारको पनि अभिनय रहेको छ ।

फिल्मले भारतमा मात्र १६७ करोड कमाइ गरेको हो । विश्वभरबाट भने झण्डै २ सय ५० करोड कलेक्सन गरेको भारतीय मिडियाले दाबी गरेका छन् । नेपालमा पनि यो फिल्मले अन्य फिल्मका तुलनामा बढी शो पाएको थियो ।