भारत– भारतमा जारी आम निर्वाचनमा अन्तर्गत छैठौं चरणको मतदान जारी छ ।

विभिन्न ७ राज्यका ५९ सिटका लागि मतदान भइरहेको हो । यो चरणको मतदानमा ७९७ जना उम्मेदवार रहेको भारतीय निर्वाचन आयोगले जनाएको छ ।

यो चरणमा उत्तर प्रदेशका १४, हरियाणाका दश, मध्यप्रदेश, बिहार र पश्चिम बंगालका आठ–आठ, नयाँ दिल्लीका सात र झारखण्डका चार निर्वाचन क्षेत्रमा मतदान भइरहेको भारतीय सञ्चारमाध्यमले जनाएको छ ।

आजको मतदानमा केन्द्रीय मन्त्री मेनका गान्धी, समाजवादी पार्टीका अध्यक्ष अखिलेश यादव, काँग्रेस नेता दिग्विजय सिंह र भारतीय जनता पार्टी (भाजपा)का प्रज्ञा सिंह ठाकुरलगायतका नेता प्रतिस्पर्धामा छन् ।

भारतमा गत अप्रिल ११ देखि यस पटकको लोकसभा निर्वाचन भइरहेको छ । सात चरणमा हुने केन्द्रीय निर्वाचनको अन्तिम चरण यही मे १९ मा सम्पन्न हुनेछ ।

भारतमा आगामी मे १९ तारिखका सातौं तथा अन्तिम चरणको निर्वाचन हुनेछ । चुनाव सम्पन्न भएको चार दिनपछि अर्थात आगामी मे २३ मा मतगणना हुनेछ ।