काठमाडौं– आईसीसी यु—१९ विश्वकप एसिया छनोेटमा नेपाली युवा टोलीले विजयी शुरुवात गरेको छ ।

बिहीवार भएको पहिलो खेलमा नेपाली युवा टोलीले सिंगापुरमाथि २ सय १७ रनको शानदार जीत हात पारेको हो ।

टस हारेर ब्याटिङको निम्तो पाएको नेपाली टोलीले दिएको २ सय ८३ रनको लक्ष्य पछ्याएको सिंगापुरले ३१ ओभरमा सबै विकेट गुमाउँदै ६५ रन मात्रै बनाउन सक्यो ।

सिंगापुरविरुद्ध नेपाली युवा बलर हावी देखिए । जसमा पवन सर्राफ, कुसल मल्ल र सूर्य तामाङले उत्कृष्ट बलिङ गर्दै सिंगापुरको ब्याटिङ अर्डर कमजोर बनाएका थिए । यस्तै, सिंगापुरका लागि इशान सवानेले सर्वाधिक २८ रन बनाए भने साईभेन्यु गोपालले १८ रन बनाउनु बाहेक अन्यले राम्रो ब्याटिङ गर्न सकेनन् ।

सिंगापुरविरुद्ध नेपालका सर्राफले ३ विकेट लिए भने मल्ल र तामाङले समान २—२ विकेट लिँदा राशिदले १ विकेट लिएका थिए ।
यसअघि पहिलो ब्याटिङ गरेको नेपालका लागि कप्तान रोहित कुमार पौडेल र ओपनिङ ब्याट्सम्यान पवन सर्राफले नेपालको ब्याटिङ इनिङ सम्हालेका थिए ।

कप्तान पौडेलले १ सय ५ बलको सामना गर्दै ९५ रन बनाएका थिए भने पवन सर्राफले ४७ रन बटुले । त्यस्तै, नेपालका बलिङ अलराउण्डर राशिद खानले ४८ रन बनाए भने अर्का बलिङ अलराउण्डर कमलसिंह ऐरीले ३१ र भीम सार्कीले २६ रन बनाएका थिए ।

यस्तै, नेपालविरुद्ध टस जितेर पहिलो ब्याटिङ गरेको सिंगापुरका लागि अर्थभ गुनेले ४ विकेट लिए भने राहुल शर्मा र विनित मेहताले समान २—२ विकेट लिएका थिए ।

नेपालले आफ्नो दोस्रो खेल भोलि(शनिवार) युएई विरुद्ध खेल्दै छ ।